مارک زکر برگ کی زیرِ ملکیت اور فیس بک اور انسٹاگرام کی مالک کمپنی میٹا کی جانب سے "تھریڈز" نامی ایپ لانچ کردی گئی۔
مارک زکربرگ کے مطابق نئی ایپ تھریڈز کے لانچ ہونے کے بعد صرف ایک گھنٹے کے دوران 50 لاکھ افراد نے اکاؤنٹ بنائے۔
محض اولین 7 گھنٹوں کے اندر ٹوئٹر کلر (killer) کے نام سے سامنے آنے والی ایپ کے صارفین کی تعداد ایک کروڑ سے تجاوز کر گئی تھی جبکہ متعدد اہم شخصیات بھی میٹا کے اس پلیٹ فارم کا حصہ بن گئی ہیں۔
مگر تھریڈز پر اکاؤنٹ بنانے کے بعد ان لوگوں کو معلوم ہوا تھا کہ وہ میٹا کی اس نئی ایپ کو انسٹاگرام اکاؤنٹ ڈیلیٹ کیے بغیر چھوڑ نہیں سکتے۔
مگر اب ایسا ممکن ہے یعنی آپ انسٹاگرام کو ڈیلیٹ کیے بغیر تھریڈز اکاؤنٹ کو غیر فعال کرسکتے ہیں۔
انسٹاگرام کے سربراہ ایڈم موسیری نے اس اپ ڈیٹ کا اعلان کیا۔
تھریڈز کے صارفین ایپ اوپن کرکے سیٹنگز میں جائیں اور وہاں اکاؤنٹ کے سیکشن میں ڈیلیٹ یا ڈی ایکٹیویٹ پروفائل آپشن کا انتخاب کریں۔
اس فیچر کا مطالبہ صارفین کی جانب سے کئی ماہ سے کیا جا رہا تھا۔
مگر اس تبدیلی کے باوجود انسٹاگرام اور تھریڈز ایک دوسرے سے جڑے رہیں گے۔
تھریڈز کا حصہ بننے کے لیے ایک انسٹاگرام اکاؤنٹ کی ضرورت ہوتی ہے اور اس نئی سوشل میڈیا ایپ کے واحد میسجنگ فیچر کا استعمال بھی انسٹاگرام ان باکس کے بغیر ممکن نہیں۔
